Batakisme

  Sukkun do mula ni sise, sukkun do mula ni hata.. Ni buat sige do binaen tukkol ni sopo Dang sala manise nangpe naung takkas binoto... Asa dia ma laklakna dia ma unok na? Dia ma hata na dia ma nidok na?   Takkas ujuan purba takkas uju angkola.. Takkas ma hita maduma, jala takkas ma hita mamora Sitakkas ni nauli sitakkas ni nadenggan.. Takkas ma hatahon hamu...

Tuat si puti, nakkok sideak, Ia i na ummuli, ima ta pareak. Aek godang tu aek laut, Dos ni roha sibaen na saut. Sinuan bulu sibahen na las, Tabahen uhum mambahen na horas.

Dolok ni Simalungun, tu dolok ni Simamora Salpu ma sian hamu na lungun, sai hatop ma ro si las ni roha. Sai tading ma na lungun, ro ma na jagar Hariara madungdung, pilo-pilo na maragar,

Martahuak ma manuk di bungkulan ni ruma, Horas ma hula-hulana, songoni nang akka boruna Simbora ma pulguk, pulguk di lage-lage, Sai mora ma hita luhut, huhut horas jala gabe Eme ni sitambatua parasaran ni si borok, Debata silehon tua, horas ma hita di parorot. Sititik ma sigompa, golang-golang pangarahutna, Tung so sadia pe naeng tarpatupa, sai godang ma pinasuna. Pinasa ni Siantar godang rambu-rambuna, Tung otik pe hatakki, sai godang ma pinasuna. Napuran tano-tano rangging marsiranggongan, Badan ta i padao-dao, tondita i marsigomgoman. Marmutik tabu-tabu mandompakhon mataniari, Sai hot ma di hamu akka pasu-pasu, laho marhajophon akka na sinari. Bona ni pinasa, hasakkotan ni jomuran, Tung aha pe dijama hamu, sai tong ma dalan ni pasu-pasu. Mandurung di aek Sihoru-horu, manjala di aek Sigura-gura, Udur ma hamu jala leleng mangolu, hipas matua sonang sora mahua.

  Bulung ni Taen tu bulung ni Tulan Ba molo tarbahen, sai topot hamu hami sahali sabulan, Molo so boi bulung ni tulan, pinomat bulung ni salaon, Ba molo so boi sahali sabulan, pinomat sahali sataon.